എഴുതുമ്പോള്‍ വല്ല്യ വാക്കുകള്‍ തിരയാന്‍ ഞാന്‍ ഏറെ കഷ്ടപെടാറുണ്ട്... നിനക്ക് ബഷീറിന്റെ ചുവയണെന്നാണ് ചില കൂടുകാര്‍ എന്നോട് പറയാറ് ... അവര്‍ കളിയാക്കി പറയുകയാണെങ്കില്‍ കൂടി ക്രെഡിറ്റ്‌ ആയി ഞാന്‍ അതങ്ങെടുത്തു... എഴുതുമ്പോള്‍ പലപ്പോഴും ബഷീര്‍ സ്റ്റൈല്‍ തന്നെയാണ് എനിക്കും ഇഷ്ടം.. ആര്‍ക്കും മനസിലാകും... ഒരിക്കലും എഴുത്ത് ഞാന്‍ എന്റെ മലയാളത്തിലുള്ള നൈപുണ്യം വെളിപ്പെടുത്താനായി ഉപയോഗിക്കാറില്ല... അത് ഉള്ളതായി തോന്നിയിട്ടുമില്ല...ഒമ്പതാം ക്ലാസ്സിലെ രണ്ടാമത്തെ ബെഞ്ചില്‍ ബീന ടീച്ചറുടെ മലയാളം ക്ലാസ്സില്‍ ഇരിക്കുമ്പോള്‍ ഞാന്‍ ആലോചിച്ചിരുന്നു... ആരാണീശ്വരാ!!! ഈ കവിതയ്ക്ക് വൃത്തമൊക്കെ കണ്ടുപിടിച്ചതെന്നു... എന്റെ പ്രാര്‍ത്ഥന കേട്ടിട്ടാവണം വിദ്യാഭാസ മന്ത്രി പി.ജെ.ജോസഫ്‌ സര്‍ പ്രസ്താവന ഇറക്കി... ഇനി മുതല്‍ മലയാളം ഗ്രാമര്‍ പഠിക്കേണ്ടതില്ല എന്ന്... മോനെ മനസ്സില്‍ ഒരു ലഡ്ഡു പൊട്ടി!!
ബീന ടീചെറിനോടുള്ള ഇഷ്ടമാവാം ഞാന്‍ മലയാളം ഇഷ്ടപെടാന്‍ കാരണം... പ്ലസ്‌ 2 കഴിഞ്ഞപ്പോള്‍ മലയാളം മെയിന്‍ എടുത്തു പഠിക്കണം എന്ന് തോന്നി... ഞാന്‍ എങ്ങാനും മലയാളം എടുത്താല്‍ അമ്മ തല തല്ലിചാവും എന്ന് തോന്നിയപ്പോള്‍ ആ ആഗ്രഹം കുഴിച്ചു മൂടി... അപ്പോഴാണ്‌ അമ്മയുടെ ആത്മസുഹൃത്തിന്റെ മകള്‍ ബി.ടെക് എടുക്കാന്‍ തീരുമാനിച്ചത്...അതോടെ എന്റെ അമ്മ വെറുതെ ഇരിക്കുമോ?? എന്നെയും എന്ട്രന്‍സ് എഴുതിപ്പിച്ചേ അടങ്ങു എന്നായി... കുത്തിട്ടു കളിക്കുന്ന ലാഘവത്തോടെ ഞാനും എന്ട്രന്‍സ് എക്സാം എഴുതി... ദൈവത്തിനുഎന്ത് തോന്നിയിട്ടാണോ എന്തോ? എന്റെ റാങ്ക് മുന്നില്‍ വന്നു... അഡ്മിഷനും കിട്ടി... 4 വര്‍ഷം ... ഞാന്‍ ആ ചുമരുകള്‍ക്കുള്ളില്‍ പഴകിയ പുസ്തകങ്ങളുടെ ചൂരടിച്ചു ജീവിച്ചു... അവിടെ നിന്നും പുറത്തു വന്നപ്പോള്‍ ... മലയാളത്തോടുള്ള സ്നേഹം കൂടിയതെ ഉള്ളു...
സംസാരത്തില്‍ കുറച്ചു ഇംഗ്ലീഷ് കലര്‍ത്തുന്നത് ഇന്നത്തെ സമൂഹം ഒരു ആഠ്യത്തമായി കരുതുന്നു... da i wnt b cumin 2dy ... എന്ന് മെസ്സേജ് കിട്ടുമ്പോള്‍ ഞാന്‍ ആശിക്കാറുണ്ട് ... ഞാനിന്നു വരുന്നില്ലാടോ എന്ന് അയച്ചിരുന്നെങ്കില്‍ എന്ന്... k da..miss u... എന്ന് തിരിച്ചു അയക്കും..ഇന്നിത്തിരി മനസ്സമാധാനം കിട്ടും എന്നാവും മനസ്സില്‍ ... എങ്കില്‍ കൂടി ആര്‍ക്കു മെസ്സേജ് അയക്കുമ്പോഴും.. മെയില്‍ അയക്കുമ്പോഴും .. ഈ അക്ഷരങ്ങള്‍ കൂടി എഴുതാന്‍ നമ്മള്‍ വിട്ടു പോകില്ല... miss..u.... നഷ്ടപ്പെടുന്നു നിന്നെ എന്നാവാം മലയാളത്തില്‍ ... അത് കൊണ്ടാവാം നഷ്ടപ്പെടലുകള്‍ ഏറ്റുവാങ്ങാന്‍ ഇഷ്ടപെടാത്ത ഈ സമൂഹം miss..u.. നു ഇത്ര പ്രാമുഖ്യം കൊടുക്കുന്നത്,,, പക്ഷെ പലപ്പോഴും തിരക്കില്‍ അവര്‍ എല്ലാം നഷ്ടപെടുന്നു താനും...
ഇന്നെന്തോ ബ്ലോഗുകള്‍ തിരയുന്ന കൂട്ടത്തില്‍ ഒരു ബ്ലോഗ്‌ കണ്ടു... മലയാളത്തിലെ കടുകട്ടി വാക്കുകള്‍ കൂട്ടിച്ചേര്‍ത്തു ഒരുപാടു എഴുതിയിരിക്കുന്നു... എനിക്കത്രയും അക്ഷര ജ്ഞാനം ഇല്ലാത്തത് കൊണ്ടാവാം... ഒരുപാട് സമയം അതിനു മുന്നില്‍ ചിലവഴിച്ചു... മനസ്സിലാക്കാന്‍ ബുദ്ധിമുട്ടുള്ള ഒരുപാട് വാക്കുകള്‍ കൂട്ടിച്ചേര്‍ക്കുന്നതാണ് ഇപ്പോഴത്തെ ട്രെന്‍ഡ് എന്ന് ഒരു സുഹൃത്ത്‌ പറഞ്ഞു തന്നു... ഒന്നും മനസിലാവാതെ വരുമ്പോഴാണ് അതിനു കലാമൂല്യം കൂടുന്നതെന്നും... അത് കൊണ്ട് മലയാളം പഠിക്കാതെ പോയ എന്നോട് എനിക്ക് തന്നെ ലജ്ജ തോന്നി... മൊബൈലില്‍ നീയിട്ടു കുത്തുന്നത് പോലെയല്ല മലയാളം എഴുത്ത് എന്ന് കൂടി അവന്‍ അടികുറുപ്പിട്ടു ...
മലയാളം മറന്നു തുടങ്ങിയ മലയാളികള്‍ ഇങ്ങനെയും മലയാളം വാക്കുകള്‍ക്ക് പ്രാമുഖ്യം കൊടുക്കുന്നുണ്ടെന്നു ഞാന്‍ തിരിച്ചറിഞ്ഞു... പിന്നെ എന്തിനാണ് ഏതു നേരവും u know... actually... എന്നൊക്കെ മലയാളികള്‍ ഇടയ്ക്കിടെ ഉരുവിടുന്നത്... എന്റെ മകള്‍ക്ക് മലയാളം അറിയത്തെ ഇല്ല എന്നതില്‍ അമ്മമാര്‍ അഭിമാനം കൊള്ളുന്നു?? ഒരുപാട് ചര്‍ച്ചകള്‍ നടന്നു കഴിഞ്ഞ വിഷയം... അഭിപ്രായം പറയാനും ഒരുപാടു പേര് !!!
da.. r ..u der?? എന്നൊരു മെസ്സേജ് എന്റെ മൊബൈലില്‍ വന്നു... ചിരിയടക്കാനാവാതെ ഞാന്‍ ടൈപ്പ് ചെയ്തു yups!!
